Esta foi a conclusión á que chegou o alumnado de 2º da ESO da materia de Igualdade de Xénero cando revisou todo o material bibliográfico con que o CFR de Ferrol enchera a maleta violeta da Igualdade.
Iolanda, profesora de Igualdade e coordinadora do Quérote +, traballou con estes títulos tanto no grupo de Igualdade de 2º da ESO como cos grupos de 3º implicados no Quérote+. Collían un libro, lían algunhas páxinas do interior ao chou (sen ler a sinopse da contraportada) e facían unha reflexión para o grupo sobre o argumento e a temática que crían que podía ter.
No día internacional da muller traballadora, as nais, avoas, irmás, tías, primas, fillas... do noso alumnado, foron as protagonistas na celebración do día.
Trouxemos os seus mandilóns e plasmamos neles os motivos polos que nós tamén parabamos en apoio á folga convocada polos colectivos feministas. Promovido desde o equipo Quérote+ e Igualdade de Xénero, tamén colaboraron especialmente Por 365 días de respecto e igualdade e Donas de si.
Logo de confeccionarmos a pancarta, colgamos os mandilóns no cerre do instituto e marchamos cara o punto de encontro coa manifestación máis próxima.
Foi moi emotivo ver como traballadoras e nais se achegaban a nós e dábanlles os parabéns ás alumnas e alumnos que alí estaban protestando pola aínda precariedade e desigualdade da muller no traballo. Logo das 2 horas de paro volvemos ás aulas e deixamos no corredor central a pancarta e mais os mandilóns como lembranza do día.
