PROXECTO TERRA VISITA PORTO V

...E culminamos a nosa viaxe coa visita á famosa libraría, Livraria Lello e  Irmão tamén coñecida como Liivraria Chardron, situada na Rúa das Carmelitas, núm 144, moi preto doutro dos símbolos da cidade de Porto, a Torre dos Clérigos. Construída no século XVIII, desde os seus 76 metros de altura ofrece unhas magníficas vistas e serviu de vixía ou faro para as embarcacións do Duero. A torre, única das dúas que se deseñaron en principio, como a igrexa, é exponente do estilo barroco. 

No seu terceiro nivel atópanse 49 campás que repican catro veces ao día, sinalando as horas, e que se sumaron o pasado 21 de abril ao concerto simultáneo que ofreceron máis de mil campanarios en todo o mundo para difundir o toque de campás como patrimonio cultural da humanidade neste ano que precisamente está dedicado a este tema pola UNESCO.

Cruzando a praciña de xardíns chegamos á  libraría, que foi fundada por Ernesto Chardron en 1869. En 1894, José e António Lello adquiriron a propiedade. 
En 1906 inagurouse o edificio  en neogótico portuense, proxecto de Francisco Xavier Esteves.

O lema da libraría, "Decus in labore", "decoro [ou dignidade] no traballo" atópase na vidrieira do teito da libraría. A súa escaleira serpenteante que conduce ao segundo piso, os seus andeis oxivais e as  filigranas do artesoado deixan abraiado o cliente.

Parece que a libraría inspirou a J. K. Rowling, quen residiu en Porto durante unha época dedicándose a dar clases de inglés nunha academia. Porén, ningunha escena da libraría Florish and Blotts do rueiro Diagon da súa saga de Harry Potter foi rodada no establecemento portuense. 

O establecemiento  Lello e Irmão figura en varias publicacións como unha das librarías máis fermosas do mundo.